20 İyun 14:57 Bakı-2015: Məmişzadə 1/4 finalda, Səlimov erməniyə şans vermədi - YENİLƏNİB
BAKI-2015 xəbərləri 20 İyun 14:57
7686 baxış

Bakı-2015: Məmişzadə 1/4 finalda, Səlimov erməniyə şans vermədi - YENİLƏNİB

Bakı-2015 Avropa Oyunlarında boks yarışları davam edir. Apasport.az saytının məlumatına görə, bu gün daha 6 çəki dərəcəsində 1/8 mərhələsinin görüşləri keçirilir.

 

Bunun 4-də kişilər, 2-də qadınlar mübarizə aparırlar. Artıq Azərbaycan yığmasının 2 boksçusu rinqə çıxıb və bugünkü çıxışını başa vurub. Döyüşlərin nəticəsinə əsasən Tayfur Əliyev (56 kq), Teymur Məmmədov (81 kq) və Məhəmmədrəsul Məcidovun (+91 kq) ardınca Elvin Məmişzadə və Albert Səlimov da adını 1/4 finala yazdırıb. Salman Əlizadənin (49 kq) də bu mərhələdən yarışa qatılacağını nəzərə alsaq, yarımfinal uğrunda mübarizə aparacaq kişi boksçularımızın sayı altıya çatıb. Digər idmançılarımız isə 1/8 final döyüşünə sabah çıxacaq.

 

Boks

Kişilər

52 kq

Millimizin liderlərindən Elvin Məmişzadə mübarizəyə 1/8 final mərhələsindən qoşulub. Avropa çempionumuzun rəqibi əvvəlki döyüşündə Belarus təmsilçisi İvan Fiqurenkaya qalib gələn Mayls Kesi (İrlandiya) olub. 23 yaşlı boksçumuz ilk görüşündə özünü yaxşı tərəfdən göstərib. Hər 3 raundda inamlı təsir bağışlayan Elvin ciddi çətinlik çəkmədən mərhələ adlayıb – 3:0 (29:27; 30:25; 29:28). Məmişzadə 1/4 finalda bolqarıstanlı Daniel Asenovla üz-üzə gələcək. İyunun 22-nə təsadüf edəcək qarşılaşma saat 19:30-da başlayacaq.

 

60 kq

WSB liqasından Rio-2016-ya lisenziya qazanan Albert Səlimov da Avropa Oyunlarında ilk döyüşünü bu gün keçirib. Gürcüstanı təmsil edən erməni əsilli Otar Eranosyanla qarşılaşan təcrübəli idmançımız rəqibinə heç bir şans verməyib. Səlimov hər 3 raundda erməninin zəif olduğunu sübuta yetirib – 3:0 (29:28; 30:27; 30:27). Onun yarımfinala gedən yolda rəqibi Samvel Barseqyanı (Ermənistan) məğlub edən Elian Dimitrov (Bolqarıstan) olacaq. Döyüş iyunun 23-də saat 14:00-da keçiriləcək.

Xəbər lenti