9 İyun 14:00 Yığmamız üçün uğursuz "buxqalter"
FUTBOL xəbərləri 9 İyun 14:00
5849 baxış

Yığmamız üçün uğursuz "buxqalter"

AVRO-2016-nın seçmə mərhələsinin iyunun 12-də keçiriləcək Norveç – Azərbaycan qarşılaşmasını idarə edəcək polşalı Pavel Gil komandalarımız üçün uğursuz hakimdi. Apasport.az saytının məlumatına görə, 39 yaşlı FİFA referisi indiyədək 2 dəfə təmsilçimizin matçında fit çalıb.

 

Bu qarşılaşmaların hər ikisində Azərbaycan çempionu meydana çıxıb. Hər iki görüş həlledici əhəmiyyətə malik olsa da, sonda rəqib qalib gəlib.

 

2013-cü ildə Çempionlar Liqasının II təsnifat mərhələsinin cavab oyunları çərçivəsində keçirilən “Skenderbeu” (Albaniya) – “Neftçi” matçında fit çalan Gil matçın əsas vaxtında 0:0 hesabı qeydə alıb.

 

Əlavə vaxtda fərqlənən albaniyalılar çempionumuzu mübarizədən kənarlaşdırıb. 0:1 hesablı məğlubiyyət həm də Böyükağa Hacıyevin istefası ilə nəticələnib.

 

Ötən il isə polşalı Avropa Liqasının qrupunda çıxış edən Azərbaycan çempionu “Qarabağ” üçün uğursuz olub. O, Ukrayna “Dnepr”i ilə 2-ci – Bakıdakı matçda ədaləti qoruyub. Bu matçda qələbə qazanacağı halda, 1/16 finala böyük addım atmaq imkanına malik ağdamlılar meydanı başıaşağı tərk edib – 1:2.

 

Qeyd edək ki, karyerasına 2005-ci ildə başlayan Gil cəmi 4 il sonra FİFA referisi adını alıb. O, həmin il U-17-lərin, 2013-cü ildə U-21-lərin qitə çempionatının final mərhələsində iş başında olub.

 

UEFA-nın hakimlər üçün 1-ci kateqoriyasına daxil olan Gil Çempionlar Liqası və Avropa Liqasında qrup matçlarını idarə edib. İqtisadçı təhsili alan Gil ixtisası mühasibdi.